Manduco

Rafodjo

São piadas, indirectas, quase sempre irónicas, com o mesmo objectivo que o da curcutiçan.

Mi ê fidjo cachêro nobo de Nhô Lion di Bébé

El djêl dâ balanço, djêl ficâ nganhado

Djêl corrê dimanda, djêl ficâ di riba

Djêl fazê casa, djâ sail sobrado

Djêl fazê tanque, djâ sail cisterna

El djêl cumpra mula, djâ sail cabalo

El djêl cumpra tchon, djâ sail capela

Baxo sola sê sapato, êl tem dezoito raiz pâ fundo

Mi ê minino que nhâ dona criâ

Êl criam cu mimo, êl criam cu contina

‘N tem seca de galinha tchoca

bu tâ tral di ninho, êl tâ detâ na lado

Manso queto câ tâ bulido

Sima passadinha mansa, câ tâ pedrado

Simâ bizerro manso, tâ mâmâ cu gueto

Si queto câ buli queto

Ali ‘n stâ, ali ‘n ficâ

Má,

Djan odjâ pó di guerra

Qui dan gana brigâ

Má mi gó ‘n câ brigâ

Pamo ‘n câ atchâ lugar

Má si raiba dan ‘n tâ rabentâ

Má si paxon dan ‘n tâ subi caxon

‘N tâ subi caxon, ‘n tâ rabental di baxo

Agrabado djâ câ tem sôdade

Preso e doente djâ câ tem amigo

Sê amigo ê cama, coltchon, trabessêro

Sôdade di hoji ê más que num dia

Pamó djêl dan grande, djêl dan trapadjado

Frâ ês dia grande ‘n sombral maginado

Ês noti tamanho ‘n botâl a perder

Biba rilogi pulso de Narciso Gomi

Pamô bu rilogi stâ tâ fadjâ ora

Abó bu tâ marcâ mês, mi ‘n conta semana

Ronco que stâ bem la sim, ê câ di bento nem di temporal

Ê ronco nhâ rilogi tâ tchigâ na porta

Ami ‘n câ ta bai pam câ odjâ credo nem contrabando

Qui tâ bem ê bó que djâ troca conto pâ Montrond di Chia

Conto stâ na tchon, criola na ragás

Bu djâ ficâ na quarta ami na rasola

Spiam spiabo câ tâ fazê nada

Sima um beju só, câ tâ macula boca

Mi ‘n odja cama stendêdo dam gana detâ

Sima ‘n odja dargado dam gana pertâ

Qui nem lacacã tâ leia na purguêra

Mi ‘ntâ pidi favor pâ nhôs disculpam

Pamó mi ‘n dâ braço pâ trabessêro

Mi ‘n dâ pêto pâ sustento

Má mi gó ‘n dâ becho qui ê pâ matâ sede

Sima entre-arba tâ corrê na djêu

Ê sim qui sintido tâ correm na bó

Quem que quitam quem quim crê tchêu

Man crê êl quitam abenço mámá

Man ‘n crê êl quitam camin di cusinha

Pamó crêtchê ê câ cor nem ê câ dinhêro

Êl bem di raiz e linha de nós coraçan.

Cantigas (rafodjo) de Laura Joaninha - Recolha e adaptação de Leave You Lopes

 

Birado di Merca riba dola

Cu mala, maleta, saco di rôpa

Embrudjos, presentes pâ tudo parentes

Mobília pâ casa di têdja francésa

Mercano na badjo

Ê tchuba na terra

Ê pegâ, fitchâ, pertâ, largâ

Tâ dan gana nhamêbo na boca

C’mó maçã

Fregábo na dédo

C’mó magerico

Pâ tchêra curtido na pêto criola

Amor di branco

Ê tchuba na mar

Amor di mulato

Ê néba dêtado

Amor di nêgo

Ê leste na rotcha

Câ nhô spiam

Câ nhò bera’m

Nhâ dono certo

Ê um ramalhete

Qui fram na modi

Dim câ obi

Qui pidim na guêto

Pam câ negâ

Qui rodiam na modi

Câ dixam scapâ

Boca di crabo

Lingua cominho

Qu’ê más sabe tempra que tem

Boca doci

Fala sabi

Palavra falso

Papial cu mimo

Canta’l contino

Montêro ê doci

Barbosa ê sabi

Doci ê pâ tchupâ

Sabi ê pâ cumê

Si bu n’ganam

Mi ê banganha bédjo na bera’l porta

Di fora mimosa c’mó macã

Di dento imbam c’ma papaêra

Óh galo bedjo di spóra quebrado

Canta, tchumâ tê roquicê

Franga qui obil tchumal coitado

Pamó djâ êl crê má êl câ podê

Chan frabo na pundê negâ tâ duê

Detâ durmi

Sunhâ câ atchâ

Panhâ trabessêro pertâ na pêto

Cantigas (rafodjo) de Ana Procópio - Recolha e adaptação de Leave You Lopes