Manduco

Tudu cabu na mundu tem pessoas qui ta cura problemas di mal di amor, azar, sorti, união i dizunião di pecador.

Djarfogu, apezar di se pocu tradição nes campu tem surgidu, di bes a bes, uns homis sabedoris, qui dixa marca na curas cu ramedi di terra ( padjas), tra faticera, panha mininu codjera, inclusive raza contra temporal, usando tizora i sinza Nho San Djon.
Dentu dês linha li surgi também homis brajerus, qui cu ses combersu partubaxu i alguns truquis di Libru Santu Suprianu es tenta di forma intencional proveita di crensa i fraqueza di cada um pés satisfaze ses vontadi carnal.

Foi assim qui Djon, homi sabidu, ratorcu i mas di riba brajeru, da conta di cazu di Maria qui ta viveba la pa quês ribadu di serra, mas bunitona i, inda mas pura i acreditadera.
Maria nunca odjaba Djon, mas el, Djon, dja grabataba storia di Maria i djel sabeba ma se maridu dja tinha 15 anu na Lisboa i di qui Maria ta quexaba sempri ses amiga cuze quel deba fazeba pa se maridu binha vizitaba el, nem que so pa um simana.

Antan, num belu dia di Novembru di 1961, anu qui fincape da cumida, Djon parce pa quel banda, i di pripostu, el conco na se porton, undi catcho qui Maria tinha comu mau, banal rabu, i spantadu, mas cu alegria, Maria fra-l cuze nho cre?

Djon na se stilu " dotor" el fral: cumo n sta cu presa, mas tambe cu sedi, n-cria um caneca d'agu si nha podia.

Maria na se jeitu bondosa el fral não; nho entra, nho tuma café di tarde, pamodi caminhu e longi.

Cu insistência Djon entra na sala i el sinta num bancu qui staba encostadu na cantu casa.
Dipos di el bibe i quel tuma se café Maria começa ta contal storia di se bida.
Maria fral ma tudu sta dretu, mas só quel tinha vontade pa se maridu binha di Lisboa pa binha conxeba se filha qui sta bai entra na 15 anu di idadi, sem el conxel.
Djon obi tudu i na tom di um grandi mestri el fral: Mi djam uni tcheu família qui staba imbarcadu, djan da sorti i n-abençoa tcheu lar. Portantu si nha cre nu podi fidja contratu i tudu ta fica entri nos, pamodi e segredu di Deus.

Maria anciosa el purguntal cuze quel ta faze pel trazel se maridu di volta?
Djon explica-l qui ervas, agu, roba i lençol qui el debe prepara pa próximu trabadju di sexta fera.

Tudu di acordu es dispidi, combinadu, pes incontra próximu sexta fera na se casa.
Sexta Fera Djon labanta sedu i logu 8 hora Maria recebel na sala.
Djon pidi pel confirma si djel tumaba banhu cu agu di eucaliptu i si cama staba stendedu cu lancol brancu!? Maria, sem hesitação, fral qui sim!

Dipos, Djon splical ma el tem qui bai deta nu priti, cu rostu cubertu, 2 vela acezu, porta di se quartu abertu, di manera pa facilita entrada di maridu, i pel tchuma nomi di se maridu te qui se maridu bai atchal la i sem el discubri rostu, pamodi si el odjal antis di reza termina um dês pode morre.
Maria da di acordu; detadu moda el fra-l, Maria começa ta tchuma nomi di se maridu, Ze, baxinhu.

Djon, homi qui sempri gostaba di um oportunidadi moda quel la, el duspi i di mansinhu el bai ta aprosima.

Qantu el odja monumentu i quel obi Maria da fra nomi di se marido entra, entra, entra...Djon começa ta entra na quartu i dipos na el i Maria cada bes mas ta grita o nha maridu forti sodadi di bo!

Qantu Djon caba se oração el fitcha porta el bai se caminhu.
Maria também satisfetu cu se maridu el labanta i qantu el ca odjal el senti dentu del ma e midjor continua ta contacta cuel através di oração.

Por issu, tudu sexta Fera Djon fica ta ora na casa di Maria.

Napoleão Vieira de Andrade