Manduco

Odiu pur odiu... E justisa!

Ka ten kel otu ladu-l rostu pa (otu) bafatada (di mesmu pekador).

MpD y se akolitus, riprizentadu pa "kara (odioza, disprezanti y ipokratika) da dimokasia" ki algen, alguris alkunha Sr Carlos Veiga (pa mi kara di dimokrasia pa asbezia) sta konvensidu ma nos,inves di es - "nu ten ki muda". Ma,inda es ka fla, pa ki ladu kardial. Nos nu kre muda sin.Tudu! Te di vedju pa nobu! Ma, kabuverdianu. Patriotiku, ivolusionista...

Muda, nu ten ki sabe pa undi: pa riba o pa baxu, pa norti o pa sul y di ki manera.Ka po-nu mon undi nu ka gosta y nu ka kre! Si es mudansa ta konve-nu? SIN! O NAUN, se di dretu pa tortu,di dimokratiku pa ditador... Aburnusiu! Nos nu kre muda, ma pa undi ki nu ka sta odja rostu di ken ki nu ka kre, undi nu ka ta obi se kobersu ke nu ka kre, ki te oji se konbersu ka dixa di ser konbersu di inveja, xeiu di odiu y pulitikamenti, apezar di se konhesimentu in otus materia, pesoalmenti, N ta txuma-l A-TRA-ZA-DU!!! So pa-m ka txuma-l di un kankru o un obisekadu pulitiku. Xa-m konsedja-l un konsulta kun "XRENKI", nes se stadia na Merka. Pamo, ninhun Omi, ninhun Organizasaun, apezar di ser igual y txumadu igual, obijektivu pode ser kel me, ma fetu di manera diferenti di otu. E ka UNIKU! E ka midjo! Pamo intelijensia, sabiduria di Omi... ka ta mididu ku palmu! El pode ser prizidenti di Partidu, di Guvernu,  ma nunka e ka mas grandi di kenha ki po-l ala!

Nos nu kre muda! Ma Nu kre muda pa un kamin mas sertu, mas fasi, pamo nos (y nha) futuru e oji. Kel kamin kel ka tene y nen e ka sta mostra-nu el, mel pode konsegi. Muda, ma ka pa tras. Se pa dekada di 90, se sonhu dja bira pizadelu.In pinu,tanbe, nu ka kre anda.Nu kre muda di pobri pa riku. Ki se dinheru e ka sta danu! Y di tortu y pobri, dja nu sta distanti! Xa-nu skodje di nos. Xa-nu disidi. Nu sta na dimokrasia... Diaza! Y nu sabe-l, pamo e nos ki kria-l.

El ben desdi ki nos antisidentis... tuma konhisimentu ma nu mesteba el. E saldu di juventudi, di vida di alguns di nos skravus, konpatriotas y erois.E, sobritudu, rizultadu di sakrifisiu y sangi di nos povu, na jineralidadi!

Se guvernu ki ten ki muda, nhos fla-l, ma N fla, pel relaxa! Pamo, na se ladu, ka sta mutu algen, pa faze un guvernu dretu y kredivel. Igual a es di PAICV?! Alias, pa otu ladu, se guvernu e pa 2 dia, pamo na dimokrasia,ten NOS ditadura.Carlos Veiga e ditador! Te na diskursu! E so pergunta kes ki sta finji gosin, se amigus. Pel lembra ma txeu des, e di kelotu ladu di MpD, ki oji debe sta bastanti rapendidu, di fitxa ses (ditu) partidu: PSD, PRD y mas ki staba in vias di serba kriadu. Nu tene inda fresku es storia, na nos mimoria!

Nos e uniku "partidu uniku"... ki konkorre ku un monti di partidus y ganha ileisaun dimokratikamenti, na mundu.Y kuza ki nu faze nes 10 anus, na Kabu Verdi, ninhun guvernu di otu mundu, nen ku milagri, ka ta pode faze-l. Nen ku Robo!Nen ku inteligensia di ferru. Nen ku fabrika pa faze dinheru. El fika ku prublema, pamo "partidu uniku", dja ganha-l 2 bes y sta ta ben ganha-l otu bes.Y des bes, nu ka ta ben odja se rostu mas na nos Pais.El ta ba bira tuga.

Falta poku!

El fla ma Sr Ze Maria me mintrozu. Mel tem kunpadri y tanbe me kurruputu...Talves, Sr Ze bisti kazaku di Sr Veiga, in ves di di sel! E mintrozu, pamo el sta ta mostra kuza ki se guvernu faze; el ten kunpadri (ki parsen ma MpD y el, ten mas txeu - pa-m ka djunta familia: irmaus,primus, subrinhus); me kurruputu! Ma, ki nunka ka ta konpara ku Sr Carlos Veiga, ki apezar di tudu, N gana nha Pai y bende nha Mai... Di tudu, kumo bon samatitanu, dja-m perdua-l, pa se sakrilejiu. Ma, si el e kurruputu, kumo ki nhos sta pensa di se partidu MpD? E kabaleru ki ta gia kabalu! Pelu menus, na Djarfogu.

El sta anda ta fla, na tudu kabu, ma na Kabu Verdi, nada ka fazedu, nes 10 anus.El sta ta N gana ken ki ka ta bai tudu dia, o pelu menus un bes pur anu.Y tanbe, ken ki ka ta le!El kre, pa se interesi y interesi di MpD, tapa-nu odju ku se kabrestu. Kaskadju e ka sinza! Odju N txadu, ka odju fitxadu. Pamo se odiu, se gana y inveja dja nu konxe-l di KOR.

Oji,na Sal, Santiagu, Sanicolau, Santo Antao, Sanvicenti y na kes otus ki inda ka sta inagoradu, ka ta andadu mas na strada di kamin di cabra. Aeroporto internacional, liseus,portus, hotels,etc, djuntadu ku nos liberdadi, nos dimokrasia, sta bira-nu kadia dia mas riku, mas orgulhozu.Es e frutu di gentis di sidadi, di kanpu, digamus, di tudu Kabuverdianu, di dentu y fora di Pais.Oji, nu sta ben agradise guvernu di PAICV, in partikular, es joven, orgulhozu ydedikadu Primeru Ministru Ze maria pa se se vailizu trabadju, in prol des Kabu Verdi, ki tudu mundu sta ta da palmu.Nu sta ben fla-l, ma si tudu isu e frutu di mentira, di kunpadrismu, di kurruputismu, pel multiplika-l pa mil bes mas, pamo e unika pulitika ki sta ta konpo nos terra. Nu sta fla-l tanbe,pel mostra Sr Carlos Veiga y MpD se programa pa prosimu mandatu, pois e ka pode di forma algunl dixa-l da kabu des Kabu Verdi grandi ki-m sta odja, ker ikonomika, kuantu intelektual. pa-m ka fla di tudu na nha 58 anus di idadi.

Sr Carlos Veiga y MpD, kumo es ta pensa ma es ka kunpadri di Sr Ze Maria, es kre N ganha pa tudu meiu, pa es pode ten ses kunpadri tanbe y sen inklui Sr Ze Maria y PAICV.  Moda ki es tinha fetu na 1991. Po gentis di fora, pagas ku dinheru di sta, duranti mesis. Sr Carlos Veiga pensa ma nutaskese disu? Nen disu y tanpoku di se disprezu!Nu sta fla-l tanbe, sin na se guvernu ten kurruputu, pe-l sha so kel ki dja sta. Asin nos Pais, ka ta ben intxi di mintrozu, di kunpadris, di kurruputu...

Nu "mesti muda" sin. Pa midjor. Nu kre gatinha pa nu kunsa korre, suma sta ta kontise gosin Y nu ta gatinha, divagar, kuidadozamenti, pa nu ka ben bende kabesa manhan. E sin ke nos, e sin ke PAICV.

Sr Carlos Veiga e taun dimokratiku, taun konpitenti pulitikamenti, ki in poku tenpu el distrui MpD, ki da origen a 2 mas partdiu. E ka prendi lison. Pamo, na fin te el el dixa di ser militanti.

El fika ku pizadelo di partidu. di ki tanbe el ta faze-ba parti (e el ki prepara lei di riforma agraria). Homi ki ka ta atolera otus, pamo se idiologia e diferenti, el pa mi e dimokratiku, ma di otu planeta.El taun dimokratiku, ki nen ku se kunpnherus di trabadju, di partidu e ka ta ben konsegi txiga acordu. E taun dimokratiku ke ka gosta di perde.El kre ser senpri primeru. Sel perde e pamo povu vota na otu ka vota na el, klaru, ki na se dimokrasia, ka pode ser. Si povu ka vota pa el, e pamo se adversariu faze algun kuza pa faze-z vota na el. Es, na se disionariu pulitiku/dimokratiku el ta txumadu di ladrisa.Inda N sta spera rsizultadu di kexa kel faze na ONU.

Sr Carlos Veiga e omi seriu.Ki alguns sta ta fla. Y N ta kredita. Pamo, ninguen ka fla  inda mel da algun "kasubodi". E ka ta disvia,e ka ta disvirtua, e ka ten kunpadri...sin fidjadu! Ma te oji e ka splika undi kel dinheron bai: Pa kunpadri, o kumadri, o na kuze kel utilizadu. O se kel dinheru ki sta uzadu y kustia es kanpanha? Se ka kuel e ku dinheru di droga? Akel ki MpD fla ma Ze Maria fla, na antisidenti kanpanha, ki te oji e ka lebadu pa tribunal.

Sr Carlos Veiga, na se forma di faze pulitika,ta da-m inpresaun, mel ben di familia Alqaeda.El debe ser parentesku di B L. Pur isu se discursu e pa faze algen medu.Se diskursu e fetu ku terrorismu di palavra. Na nha analizi y di manera kel ta papia N ta kosidera-l un pirigu sosial. Si prublema gravi surgi, e Carlos Veiga y MpD ke se mentor. P sirbi Kabu Verdi di oji, e "es ki ten ki muda", na tudu sintidu di palavra, pa sirbi es Kabu Verdi, ki "partidu uniku" dixa (quasi) sen analfabetu y ku gentis altamenti formadu, na tudu sintidu di palavra.

Carlos Veigas y se komparsias di MpD, es ten medu di partidu (revolusionariu) uniku, suma ki milisias (tropa di povu, fetu pa povu, pa difende povu), surpriendes na ses, asnera y justa konta kues.Y ate, es ten razaun, pamo e sin ki es fla ma milisia eraba.

Mas tristi y odiozu Carlos Veiga sta ben fika, te kel odja ma na kurrida pulitika, nunka mas e ka ta pega Komandanti y Presidenti da Republika Pedro Pires. Segundu OMI di Afrika, nes mileniu, na se sigundu turnu e na ses dirraderu dias di Presidensia.

Pur: R. Kardozu 10 di Janeru di 2011.