Manduco

Karredinha, pa mi, ka ta dixa di izisti! Nen te ki-m morre! Pamo, e la ki-m nese y ki-m vive nhas primerus 7 anus di idadi. E la ki N terradu nha biku y ki-m komesa, ku antisipasaun, nha puberdadi. E la ki-m faze nha primeru relasaun seksual. Sen ser obrigadu! Y pa rizumi, e la ki nha DNA sta ta aroma in po, na araji di se txon y distinu. Karredinha e nha sonhu! Puren, sin dizisperu... E sonhu di obriga-m vive pa mileniu! Y el ta rivive na mi, momentaniamenti. Y tudu ki-m sonha, desdi di Bila y ses zona limitrufis N ta po-l na papel, sen furta un virgula. Rizumindu, el e Mi, nha Korasaun y Alma! E, sobritudu, nha samiteriu!

Di bez in kuandu, N ta sonha ku el y ku argun senariu pertu, mo subi y dixe monti di Armada, ta avansa un pe, ta po mon na duedju, pa guenta korpu, tuma djazigu pa ka skorrega y bota pa frenti, pa txiga kumi. Pur isu N ta lenbra tudu zigi-zagi, tudu kutelus, ruberas y ragatus, un pur un, ses laxidu… ki na altura di bara, na kamin di kabra, na sol quenti, ki ta ratxa korru, pa nu ba djunta y konvive, na irmandadi, ku gentis y familia di zona prosimu ki nu prumete txiga.

N ba Bila poku, pamo nu ka tinha burru y distansia e un poku mas ki 4 kilometru. N ta lenbra di artu-falanti di Santa Filumena, di ruidu-l mar di Bokarron, na tenpu-l txuba, di Loja nho Tuntun, Nho Iduardu-l Dadi y Pontu di Rubera Trindadi. N ta lenbra tanbe,di kabalu marradu na restu-l karru-bedju, na Xaguati. Y ken ki ka ta lenbra di tanki furadu y di Kulel Kumpridu? El ten ki ser nobu y ka di Fogu!

N ta lenbra di pontu Rubera Trindadi. Di kantu primer bez ki-m passa la, N ka ta spiaba pa mar pa-m ka maria; di rubera di Fundada, undi nu ta baba rastija galinha di gine y djobeba obu, di baxu di rijistiba, ku lakakan; di Bokanha ku rubera Piku, undi, mi, Kinha, Vera y Luta Kaela… sin dsikriminasaun di sexu, nu ta ba kodjeba lenha. N ta mandaba es subi purgera, pa-m sipias di baxu. Y dja-m te sonha, ku rubera Borta-borta. Undi sonhu bira-m pizadelu, ki faze-m tuma un seklu pa-m zigi-zagia, mo senpen: disbortia laxidu,skorrega na ladera y disliza na  areia ku xiranga, na kel rotxa ingri y diskroka na txada, sin forgu,ki parse-m otu mundu, undi N spanta.

Di ragatu y lapa go, N sonha mas txeu, pamo e la ki nu ta baba brinka “mama ku papa”. N sta ta lenbra fresku kes berdura, na tenpu seku, di spinhu pretu, spinhu katxpa, flera, tanbarina, figera y purgera, ku ramu y fodja lagadjadu y se simenti roxu, bazadu na txon, undi minis  di Karredinha ku Kobada, ta N gatxaba na brinka “Dja-ora”!

N sta lembra, tanbe, di nos tanbarina, na porta ka nha donu, ku guarda marradu na el, pamo el ta daba tanbarina, mas dosi di mundu. Se xaropi, ku kamoka, ka mesteba asukra; di kel galinha gine ki-m bafa y ki-m ba da bibe, baxu ka Soteriu, ki in ves del bibe, el bota-m na lagoa y el bua.

Kor di Seu e di mar, na Karredinha, kontinua sempri azul. Se aragi sin lestri. Nunka ka dixa di rifreska kalor nes meia fora.

Oji, dja nu dixa lenha, pa fogon di gas; padogo pa lus iletrika; kamin di kabra pa strada asfaltadu y Karredinha, na nha sonhu, e sta moda Dubai. Foi es ki-m sonha des bes. E ka bira mas grandi. Ma, el dizenvolve. Na txada ka madrinha, konstruidu un rotunda, primeru di Djarfogu, ku kuatu saida, un pa  Fundada, kes otu pa Kobada, Djan Pintu y Armada. Na se meiu, es po un statua di Amillcar Cabral, un poku mas grandi ki kel di Sal y na se ladu un kuadru pretu ku nomi in branku, di tudu erois di luta di libertasaun Nasional. Na se ladu y a volta, es konstui banku,skola, postu sanitariu, greja  di Nho San Djon, ku un risintu grandi pa gentis N saia bandera, ku renadu.

Tudu kes kaza, kes sparderu, (rodondu y retanglu) bira duplexi y kes otu, sobradu (kuazi) tudu ku txamine. Ku garaji, karru mudernu, na ladu-l dianti, ku jardin/pomar ki ten desdi videra a senpri noiva. Strada, arborizadu, ku kokeru, azedinha, baboza y sen es skese adisiona, banbarderu, ku xaluteru. Nomi, di rua ke ka purtuges, kuza ki xa txeu dizamizadi. Rua e divididu in dos, ku linha marelu ta orenta sintidu di tranzitu y ku kanteru, entri via y passeiu arvi y planta formozu, di tudu kalibri! Gosin nu pode ba Armada, Djan Pintu,pasa pa Montin D’Oru, o ba ka Soteriu y bortia pa Fundada, sen para na N tronkamentu di Malaia, ou antan, ba Katen-Brigonha, Kobada, Tongon nun so via. Pa Bila, e autu-strada di mileniu. Dos via di ba, nun ladu y dos linha di ben notu, ku saida, pa Ka Nhanha, Ramargos, Ramaskada,Lapa Soso,Tanbarininha, Kara Santxa, Fonterra, Kobon y Sanfilipi. Te pa Monti Gritu ku Tres Pedra, ten un saida.

N ta ben sunha autu-Strada pa sidadi di Koba Figera! Nu ten ki agradise NhorDes, pamo oji nu ka ten ki uza arbeka, libra y tadja nos pe di topada, na braku-l karsada, di anbrodju y di mola (finka) katxo. Y seta ku pega-saia ka ta tuma konta ben dis-ratorka-nu nos vistuariu.

Aldeia di Karredinha, ten kultura di djunta mon. E armoniozu y familiarizadu, ki ta faze inveja. Un gran di mindju, kumo ramedi di morti el ta da pa tudu txupa. Ka ten lugar nin pa kabu-xefi ou pa regedor. Ki fari pa pulisia. Nos e nos milisia, nes kumunismu primitivu! Pa kumida, nu ten mindju ku fijon, pa modju y kaldu, nu ta kria limaria, pa koroa nu ten te obu kartunis. Nu mesti txuba. Azagua! Ku isu,nu ka mesti nin partidu, nin gubernu. Nu ta tuma konta di nos kabesa. Pa sbia disu, Karredinha e linpu, di tudu mal, na tudu sintidu di palabra. Pamo, N ta sunha ma nos e riku na nos korasaun y nos alma. Y djunta mon, e se perfesaun! Te na kume e sta na se ordi di dia.

Na ladu di kutelu, tras di nos kaza, ki ta odjadu di ka nha donu Prentxentxi, depos di rubera Bokanha, es konstrui y rerva un kanpu di futubol.E li ki fazedu strada prinsipal. Urtimu parada pa Armada y  aeroportu, es kontruidu na txon di mankarra y bata, prupriadadi di Nhanha da Silva. Forti kanpu grandi, na mundu! Aviaun pode kai na meiu, el ta para antis ka Zeze. Tudu bez ki aviaun txiga, kanpu ta di multidaun. Ta pensadu mes sta bortia na pusison, ou ma Nho Prisidenti txiga. Nha madrinha Kandia, sta ta diskuti se txon ku otoridadi, El ta simiaba el in rijimi di parseria. El tinha rasaun, era bon txon di mankarra y batata, ki ta daba ku abundansia. Mankarra ta kubriba se funku y bata el ta konserbaba ku terra, moda “garnel”, na meiu di se kaza. E ta daba  pa anu interu.

Aeroportu situa entri figera baixu y Kutelu di Armiriku, di undi du pode  odja Djarfogu ku DjaBraba interu e te ratu na porta arsapaun, di ka Nhnho di Texa, pa ladu sul di nos vivenda.

Cont.