Manduco

Fin sta ta txiga fin

Pamo, tudu fin ten fin

Fin di dor, e fin di terror

E aliviu pa un sufredor.

Fin afinal ten fin

Ka sta kraditadu na mi

Mi ku nha egu dja-m vive li

Dja-m vive tanbe na konfin.

Nha dor di kundindin

Kaba, suma pasiensia pa mi’

Fika fin di partida-kumesu

Pa fin di xegada-regresu.

E na fin ki ten sodadi

Ki tanbe ten ansiadadi

Di regresa pa terra natal

Pa ba goza klima tropikal.

Fin komesa ku nha partida

Rumo a terra diskonhesida

Fin ta finda ku nha regresu

Pa nha povu y nha bersu.

N kre alivia nha sufrimentu

Y kria na mi un novu alentu

Nha orizonti verdi dja nase

Nha frontera dja dizaparse.

Un novu kamin dja abri-m

Seu na fin sempri ta kubri-m

Vida ta komesa ser konstanti

Distinu N ta trasa-l nun instanti.

Nha vida dja muda txeu

E presi ki-m faze, kretxeu

N fla-bu ma tudu ten fin

Ma bu ka kradita na min.

Ma fin di un e kumesu di otu

Na kumesu ten dretu y ten tortu

Des lison nu ten ki ten fatia

Na futuru nu ten ki konfia.

Pur: R.Kardozu - 9 di Nov. 1989