Manduco

N staba sintadu mi só

Mi só,

Ta pensa na bo

Kretxeu,

Só bó,

Ta kontenpla y admirá

Beleza

Ki bo natureza

Bu fazé ku klareza:

Nuven na Séu,

Ta pasá

Pasá,

Briza na mar,

Ta ondulá

Y rolá

Ta kebrâ na areia,

Nun ton

Di dor

Nun susurru tristi

Y sufredor.

Skuta-m ó flor es gritu

Di dor,

Gritu d'un korasaun

Sufredor,

Di un alma,

Ki ironia

Destrosa.

Supliká mar pa kura-m

Kâ bu kansá,

Nha tormentu nasé

Na partida di nha kretxeu

Pa terra prometida.

Skuta-m ó Séu,

Es nha lamentu

Pedi Deus,

Pa lebia-m nha sufrimentu

Lâmentu dun korasaun feridu

Ki distinu dixá distrosadu

Supliká mar

Pa kura-m nha tormentu

Y nha tortura,

Ki surgi ku partida

Di nh'Amor pa terra lonji.

N spia pa distansia,

N saná

Na horizonti

N odjá-l tà kanbá

Nha legria djunta na nha tristeza

N txorâ:

Partida e un morti pikininu

N pensa

Talves, na regresu

Un dia nu inkontra.

Es speransa ê ka prata

E ka oru

E presi,

E nha versu in koru

Ki-m ta simiá na manhan

Di un pueta

Nun dezeju

Y un gostu profeta

Di priskrevé un distinu

Vindoru.

Pur: R. Kardozu - 1982