Manduco

Fafibeludo sta sintado na poial, ku se amigo, primo, e kumpah, lion di kobom grande. Oji, em vez de critika vida dos otrus, ez resolva papia di assunto mas importanti – recenseamento, ileissaum e politika. Ez ta exerssê sez dever de cidadania: Diskuti, pondera e da opiniaum; Ka dixa nada passa dispercebido; mesmo longi di terra, ez kre da kontribuissaum. No fundo, no fundo, terra e di ses tambê!

Fafebeludo: Kumpah nho tem ki ba ressencia pamoh Cabo Verde sta meste konta numero de populacao pa proximu ileissaum.

Lion De Kobom grande: Konta populacao paki kumpah? Populacao ki ta konta pah ez dja sta tudu kontadu – ê um granzim!

FafeBeludo: Nho dixa! Nho gosta di papia asnera!

Lion De Kobom grande: Ma recensiamento goh e paki? Pa kuze?

FafeBeludo: Governo ta meste informacao sobre populacao pe-l pode plania futuro.

Lion De Kobom grande: Futuro dja sta éz tudu garantido kumpah, ka meste mas planiamento.

FafeBeludo: Nho dixa di papia tolera kumpah. Papia ku nho eh difissil

Lion De Kobom grande: Nho goh nho sta dam pa dodo. Nho ka sta odja ma tudu kes guentis ki dja esteve na governo sta bem da vida?!! Kel go ki ta fradu, ‘dixe di burro monta na kabalo’!

FafeBeludo: Tudu nao. Omi grandi goh naum.

Lion De Kobom grande: Tambê omi grandi ê dodu. Èl êl dixe di kabalo e-l monta na burru.

FafeBeludo: Dodu naum. El ê omi integro. E-l ka meste nada di ninguem. El ê ka suma kel topi seku, ki krê faze Kabu Verdi se vaca leiteira. El tchuma imigrantis di burru, mas gossim, el sta bem Merca tudu dia, pe-l bem konquistanu kel votu. El ê letraaadu!!!!Armadu em spertu!

Lion De Kobom grande: Kumpah mi goh nka gosta di primêr ministro. El kre biranu Africanu. Ami eh ka Afrikanu.

FafeBeludo: Nho ê ka Africano! Nho ê Olemaum! Só pamo nho tem um korim klaru, ku kel kabelim fino nho pensa ma nho e eurupeu? Dja nho odja benta di nariz di nho? Nariz suma kaxa tabaku.

Lion De Kobom grande: kumpah, maninhas di branku e nho ki tem. Nho ka ta bazofa ma dona di nho bem di Purtugal? Nho ka pretu, ma branku goh.!!!

FafeBeludo: Ka nho muda di assunto. Nhô ba recênssia. Nho ta meste passaporti di Kabo Verde oh bilheti di identidadi. Sinaum nho pode prizenta passaporti Maricano.

Lion De Kobom grande: Mi goh…vota eh na PP!

FafeBeludo PP ka sta korre mas, kumpah

Lion De Kobom grande: 'Ntom Kabo Verde sta bem fika entregue a bixarada.

FafeBeludo: Naum kumpah, Cabo Verde tene omis kapaz! Ez anu ‘mbá passa festa Sanfilipe! Kabo stánu goh propi sabi. Oji guentis sta imigra pa Kabo Verde. Ki dia foi, ki imigrado pa nos terra?!!

Lion De Kobom grande: Kuzas kál straga otu bez?!

FafeBeludo: Eh pa kudadu pa Topi séku ka tuma-l. Sê-l tuma rèdia, Cabo Verdi ta ba fundu dum bêz!

Lion De Kobom grande: Oh yeah!

FafeBeludo: Du tem ki recênsia pa du pode vota pa du xina Topi seko mâ ka ta brinkado ku imigrantis, espessialmente nós di Djarfogo. Si êl ‘nganha, kabo ta fika fodoku.

Lion De Kobom grande: Credu Aburnuz! Di Berbunkado fatuzes! Roska ma roska! Poh boka na indjom! Kornegu di Deus, bah inferru! Boka burru ka ta subi céu.

FafeBeludo: Kel omi go e funny! Primeru el dificulta proposta de PAI pa arranca campanha de recenseamento, e gossim el sta fra ma PAI crê recensia so 28000, porquanto tem 52,000 pa recenssia. Topi Seko crê ser ao mesmo tempo tese e antítese; sim e naum; possivel e impossivel; favoravel e unfavoravel; de alpha a omega!

Lion De Kobom grande: Kumpah, dja tchiga di politika. Ami nkrê pa Cabo Verde bira um país mas sério. Ta fazedu mutu festa dimaz. Tudu sumana ta kumenssa um festival.

FafeBeludo: E por isso que crime ka sta kaba. Jovens tenki ranja troko pa ba festa. Assim e kassu bodi ta ba, kasso bodi ta bem.

Lion De Kobom grande: Si era na tempo milicia, milicia ta daba ez da kasso bodi. Milicia ta poba ez na linha.

FafeBeludo: Kumpah, dja tchiga de politika. Mi ora kim ritáia, ‘nsta nha kamim. Djam kansa ku Merca. Nho du ba bota um kako antes ‘n xatia

Lion De Kobom grande: Nho du ba! Xa politika la na se kanto keto!