Manduco

Posto Escolar Número 39 - Ribeira do Ilhéu, Mosteiros, Fogo

Pa Agnelo A. Montrond, USA

Dedikatória: N ta didika es puema pa nha amigu y parenti Manuel Barbosa Amado, más konxedu pa Nélinhu di Casimiro, ki falisê resentimenti na Rubera Djeu, y tanbe en memória di nha falesidu pai, Agnelo Montrond, nha prumeru prufesor ki inxina-m skrebe nha primeru nómi Agnelo, ku amor, karinhu, arti, y sabedoria. Pás y diskansu itérnu a ses almas na paraizu.

Nakel ténpu, mundu éra otu

Argen éra tudu unidu

Móda bagas di ruman di Péna Ratxadu

Sén nada ma ku tudu

//

N ta lenbrâ di nha pruméru prufesor

Minina Néta ki xina-nu kantâ “Heróis do Mar”

Palmatória éra ruspetu y rigor

5 di Julhu di 1975 inda staba na ar

//

Ai kel rekrêiu kumó éra sabi pa nos tudu!

Mininas ta brinkaba róda ta kantâ estantira tudu dikoradu

Ki dufuntu Ntoninhu Purkópu ta obiba es na Seladu

//

Otus ta djugaba pédra: aiz-un … ax-kruzadas …

Mosus ta fazeba u-éni-trial prumeru

Pa brinkaba un pur un … séti ki leva nus ku …

Kes otus ta djugaba djinba

Ó ta kokiba ku tapu serveja lója ká Guinélu di Manina

Tó ki txigaba óra di sabatina

//

Tinha sinéma bibu y sinéma mortu

Fórti N ten sodadi di kel ténpu

Ki Nho Padri ta mostraba-nos na kaza skóla

Ténpu ki ba y ka ta voltâ nunka más na mundu

//

N ta lenbrâ klarinhu di kel ténpu

Ki Casimiro éra nha prufesor na kuarta klasi

Kantu el dizenhaba Amilcar Cabral na kaza skóla

Y pa ignoransia gentis tudu fikâ revoltadu ku kel róstu

Ki rádiu kóntra banda ta fraba ma éra “Kóntra Nasan”

//

Minis korré di Kutélu barâ Serkinhu

Bá Kanal, ben Ruberinha

Ku bandera di UPIC na mon

Ta gritâ inosentimenti: VIVA PORTUGAL

Abaixu AMILCAR CABRAL

Ki lutâ pa liberta-s di jugu kulonial

Y da-s direitu di kantâ ses própi inu nasional

Sol, suor e o verde e mar,

Séculos de dor e esperança:

Esta é a terra dos nossos avós!

… Nós vamos construir na Pátria Imortal

A Paz e o Progresso!

//

Nha genti ignoránsia dja ten fórsa

Kel ki kontiseba ku indipendênsia

Sa ta kontisê gosin ku nos lingua Kriolu

Ta gritadu inosentimenti ku lingua kunpridu na bóka

VIVA PURTUGES nos lingua ofisial

Abaixu ofisializasaun di KRIOLU

Kondisaun inda ka sta kriadu

Ki nporta-nu la …

//

Du pruveitâ du liderâ es misaun suisida rabentóla

Pa du ka xâ es akordu bá pa dianti

Asin du ka ta fikâ pa trás

Du ta skerdia PAICV pa direita na imigrasaun

Du ta da imigrantis xapéu

Du ta da-s un tóki du ta fuji pa ladu

Du ta ba spera-s na urna na 2011

Si es ka kaí, es ka ta kaí nunka más …

//

Trumódi povu e móda toru

Un mininu el só pode leba-l pa fonti

Un mininu podê marra-l y dismarra-l

Un mininu podê po-l un tornel

Un mininu podê leba-l pa matadoru …

Agnelo A. Montrond

Http://alupeckatentadju.blogspot.com" target="_blank" rel="nofollow">http://Http://alupeckatentadju.blogspot.com