Manduco

Mane prometeba ma dos dia dipos el ta voltaba pa Bila, logu na primeru karru. Kuazi três mes dipos, ku trinta e dos kilu a mas, inda el staba na fora, ku Bila lonji di se pensamentu. Pa ka papia-l na Bila propi! Kuze ki el al ba faze na Bila, si na pundi el sta ningen ka sta txuma-l "rabu pexi" o "pexi seku". Otu argen ate ta txuma-l di "Manuel". Mudje k'el djudaba na prenxe papel pa kuzas di minis di skola, txiga di txuma-l di "senhor Manuel". Naaah, kumo k' el al baba Bila?! Argen al brinka fra-l-el!

Mane fika difinitivamenti na Fora, na kaza di avos di Manhol. Lolita ta pasaba maioria di tenpu na Musteru ta sirbi se irman mas grandi ki kaba di tinha un fidju. Ma, regularmenti, pa fin di simana, el ta binha pa kaza. Manhol kontinua ta ba se skola na Bila y ta ben kaza pa fin di simana. Atraves d'el, Mane ta fazeba arguns kontatu ku Bila, lugar kel prumeteba ma el ka ta dixaba pa mas di ki 24 hora.

Na auzensia di fidjus, Mane ba ta okupa kel xpasu, ta aprende trabadjus di kanpu, ta djuda tantu pais komu avos di Manhol ku Lolita. Na poku tenpu, gentis grandi bira ta gosta d'el. El ranja un tenpu, di pramanha ku di tardi, pa ta da xplikasaun pa uns mininus ki ta staba na skola. Fidju di pais ki tinha alguns meius, o fidju di emigrantis ta daba argun kontribuisaun. Tanbe, senpri ki pusivel, el ta djudaba gentis na prenxe arguns papeladas. Asin, el ta ranjaba argun troku di po na bolsu. Nes aspetu, kabu ka staba mau. Barku Merka ta txigaba na fim di Dizenbru, kumo el ta trabadjaba na Barkabaler, el konpromete na djuda uns gentis na dizenbarasa papeladas y dispaxu di bidon ku gradi. Kel ta ben daba el un bon ajuda, di serteza. Nunka Mane sintiba ruspetadu sin na se vida. Te senhor Manuel dje-s txuma-l dja! Ahahah, Bila nunka mas!

Agó e Bila...!

Mane bira ta ba greja. Mane bira ta kredita na santo ki nunka argen ka imajinaba. Tudu dia dimingo el ta fikaba "tam", konsentradu na imajen di santa ki nen kuze ki fradu el ka ta obiba. Se odju e so na lolita. El era se santa. El ki ta lebaba el greja. El e mas ki tudu santa! Fin di simana el ta sta na paraizu. Lolita ta ben. Lolita ta ba greja, el ta sigi-l, el ta entra na gloria; el ta sinti paz, el ta sinti amor, el ta sinti paixaun; el ta arri mas di ki karkel loku; el ta sinti korasan mas grandi ki vulkaun, ma, pertadu na se petu suma bagu na ruman. Se vida e fin di simana kel ta vive-l. Mei di simana e ka nada. Mei di simana e un tortura ki ka ten fin. Mei di simana izisti so pa po fin di simana mas lonji. El ka sabe ki tenpu ki Lolita ta binha di Musteru difinitivamenti.

Mane teneba se ropa tudu priparadu. Fresku y ben lizadu. Purfumu me el teneba. Mane bira bazofu. El manda tuma, ku Manhol, un monti di ropas kel ranjaba na barkabaler y k'el teneba furriadu na kaza di se má, la na Bila. El teneba sapato, sapatilha, sandalha, xinelu, tudu nobu, enbora uzadu. Gosin el sta un rapas, pode fra, bunitu. Lolita me dja raparaba el. Na un di kes fin di simana kel ben di Musteru el fra Mane ma el sta parseba tambra maduru- un referensia a se peli mulatu klaru. Mane ka pregaba odju kel noti. Kel kuza ki Lolita fra-l ka xa-l drumi. El fika ta obi-l noti- noti, tó ki manxe. Kel dia, kantu manxe, gentis grandi xatia un poku ku Mane pamo el labanta tardi. Es odja Mane ku kel prigisa di mosus Bila, inda pur sima, pamo el botaba uns grogus kel noti, dipos de-l obi maior elojiu di se vida, di boka di un anju, di minina mas bunita di mundu. Koitadu Mane. Kumo ki el al labanta sedu, si noti interu el ka pregaba odju? Pasensia!

Mane teneba tudu kuza prontu. Simana interu el ta prugrama kuza k'el ta fazeba na fin di simana. El ta imajinaba, el ta kalkulaba, el ta insaiaba el ta prometeba pa se kabesa: "E dês bes ke bes". Ropa lizadu fresku, trinta e dos kilu a mas na se korpu, kabelu ta lumia suma kosta korbu na sol di mei dia, kuza di karsa avontadi, purfumu priparadu...

Sábru txiga. Lolita ku Manhol binha na kel bespa di tardinha. Lolita staba mas bunita inda, ta txera fresku suma kafezal na kutelu Altu, ku kel buluza senpri na mesmu stilu- kel di tormentu. Mane kanta kel sesta fera noti, el zubia, el konta verdadi, el konta mintida, el sunha ta bua na ladu di Lolita. Di pramanha, el korda ku korasan ta bate fadigadu na petu. El baza briu dia interu, te ki sukuru fitxa. El inventa storia di gerras k'el ganha na Bila, el faze bazofaria, sukuru fitxa, noti txiga, Mane drumi el sunha, otu bes, ta bua djuntu ku lolita. Dipos, sonhu muda. Lolita era un kabalu ta galopa la na Musteru, la na txon di kafe. El era montador ta nguenta na kabelo di Lolita pa ka kai di kavalgada. Kaminhu era lonji, salabanku era txeu. Kada bes mas txeu. El rola kabelo di se kabalu na tudu dos mon pamo el sinti ma el staba ta kai. El korda retu, ku korasan fadigadu. El sinti txeru di kafé, ma el stranha pamo ningen ka ferbeba kafe inda. El diskunfia... el konfirma ma Lolita dja tuma-l konta di kabesa. Katxó ladra na rua, el labanta.

Era dia dimingu, dia di ba greja. Se ropa staba lizadu fresku, el teneba purfumu, el teneba kuza po na pé avontadi. Dês bes k'e bes- era mas un prumesa.

Ler: Mane Bobrona-Parti I