Manduco

Si oji N stâ longi di bô

Ê ka di nha vontadi Kabu Verdi

N sta li forsadu na stranjeru

Talvés, ta kunprí nha distinu.

Pa mi ê duru ês siparasaun

Xa-m konfesáb'el ku frankeza

Ês forsa ê más forti ki di mê

Ê distinu ki-m nesé ku-el riskadu.

Di bô N ka tâ skesé, DjarFogu

Ê ka morti ki farí disvontadi

Ki ta obriga-m skese di bu pó

Pa mi ku bó,siparasaun ê tamanhu.

Bon ê ki mi N ta lenbrâ di bó

Ka ten puder..., ki farí tenpu

Ki ta tadja-m un dia N volta

Pa-N bá mata ku bô nha sodadi...

Si mi ê di bô, N ta ser iternu

Pensa mal, txuma-m ingratu...

N ka tâ vende nha alma p'ês presu

Akreditâ nes verdadi di korasaun.

Si nha vida, pâ kúmulu ê ka kurtu

Un dês dia N ta bá brasá-bu

Nha korpu,nhas spritu, nha alma

Y nha pó,stâ rizervadu pa bu txon.

Pur: R.Kardozu - muzikadu

Norwich, Julhu/1984