Manduco

Mane nunka passaba di xaguate pa Norte, o di Congresso pa riba. Se vida era na Bila trás di barkon ta djobe grogu pa straga-l kabesa i dal kabu di saudi. Pa trabadju, di bes en kuandu, el ta parseba na Barkabaler pa djobe kuza faze na  Enapor o alfandega. Ora ki Barkabeler ka sta da nada, el ta djuda na bende pexi. Debe ser pamo keli ki es ta txuma-l Mane skama pexi.

Na mes di otubro, pa un fin di simana, Manhol, ki ta studaba na Bila, konbida Mane skama pexi pa ba fora ku-el. Skama pexi spia Manhol... Nunka el ka ta pensaba pasa un dia lonji di Bila. Ma Manhol era un rapazim k' el ta adimiraba txeu pamo el trata-l, el Mane, sempri ku ruspetu. Di bes en kuandu el ta traze-l argun kuza di fora.Te dinheru dj-el pista-l dja. El ka paga-l nunka, ma Manhol tambe ka fra-l nada. Pa es razaun, el ka pode diziludiba se amigu ku se risposta. Ma s'el saiba di Bila el ta morreba. El promete un risposta te fin di simana.

Sabru, Skama pexi dja staba prontu pa partida. Ma el ten ki staba na Bila sigunda fera sedu, pamo el teneba kuza di faze. Keli era diskurpa. Mei-dia, es ba panha karru, na Pontu Trindadi, ki ta ba pa fora. Mane sta ta pensa so na ora ki el ta voltaba pa bila. "Ago eba fora! Pasensia...!" era vontadi k' e' sta fazeba se amigu. Rodju pasa se bera ku kel txeru grogu di senpri, el pargunta-l pundi el staba. Mane ka rasponde-l. Un karru para pa da di fe. Era Manuel ku Jose Mendes, dos amigu di Mane. A es, Mane da satisfasan. Fafe Beludo, ki staba djuntu ku es na karru, fika ta sabe di nobidadi. Hiace staba pixadu d'argen. Skama pexi e fraku, el ta kebe na karkel kabu. El sinta entri Manhol ku Barroso di Monte Burro, kunpanheru di skola di Manhol y ki ten mesmu nomi di se dono ki ta sta na merka.

Korenta y sinku minutu dipos, es txiga. Nunka Mane ka odjaba kabu verdi sin na se bida. Azagua daba pa dizafor. Mandis sonhu di Dr Azagua, kel anu, tudu rubera bira riu. Kel tardi, Mane skama pexi sprumenta un anbienti konpletamenti diferenti. Freskura di ar rafreska-l pensamentu, kel anbienti relaxadu kalma-l se presa di ba bila, verdura di padjigal faze-l sinti, na ar, txeru di un xperansa karkel. Noti ben, divagar...divagar, sen Mane da pa el. Lus di bila sende la baxu. Ma el odja-l suma na sonhu.

Relaxadu na kel novu meiu, ora ta spia pa seu, ora ta spia pa terra, sen po sintidu, el txumadu pa jantar. El  sinta na mesa djuntu ku Manhol y se pai. Na un mumentu, porta di kintal geme, un gato gordo entra. Se tras,mai di Manhol ben ku un naki ban di baxinha berdi. El po-l riba mesa, na ladu di kel ki teneba galinha terra, mandioka, massa di farinha y batata dosi na mei di un kaldu pizadu ta rasende mantega terra. Si Mane staba grazinadu ku odju “pran” riba’l mesa, ago el fika taradu, ora ta spia na naki ku galinha, ora ta kume baxinha ku odju. El fika ka tasabe ki ora ki ta dadu ordi di avansu. Parse ma na kel mumentu, Mane dja kumesaba ta diskise di bila.

Porta torna geme. Mane fika ku odju skerda na mesa ta spia kume, ma, ku kel di direita, el spia pa porta di kintal. Era djagasida ki staba ta entra, ta rasende sabola rafugadu ku mantega terra. El staba fofu suma argudon. Kantu burtu ki traze djagasida, txiga mas pa dentu sala, ki lus da-l na rostu, Mane para di da forgu. Ago, el rinka kel odju skerda di riba-l mesa, a forsa, pa el pode konsentra tudu se vista na Lolita, minina mas bunita ki dj’el kaba di odja na se vida. “Fooorti kuuuzabuniiita!”- el pensa. “Kreki dja-N odja kuza!”; “Ka ten nun mudje ki ta po na se pe”; “ El e el so, la na artura”; “ e el propi ki Ramiro Mendes ta kanta: “Passadinha di seu di Djarfogu””. Ba Bila  staba ta parse fodoku.

Lolita, ku kel rostu murenu klaru, dos odju xeiu suma lua di kel noti, lumiadu pa un kandia ki staba ta da lus mas romantiku ki Mane skama dja odja na se vida, sinta na otu ladu di mesa, na frenti di Mane y na ladu se mai. El teneba un buluza di alsa, ke-l pega pa riba di unbru el puxa-l te ki subi un poku na mei di petu, pa kubri metadi di un almufada di amor, ki staba prenha di dizafiu y perfeitamenti xeiu di inosensia.

Lolita staba ta luzi suma bolonbolu di kel anu, ta lumia ku kel peli fresku suma mobília di madera ku pulimentu fresku. El, Mane skama pexi, apelidu ki Bazione di artu di aguadinha po-l, staba mal nutritu, fraku, seku suma lenha y ku txeru di marazia. Ma el sabeba ma el tinha trasus di buniteza. Se prublema e pamodi el staba, realmenti, mal tratadu, sabodjadu suma kel barkinu bedju k'el odja prindadu na kintal. Na se 25 anu di idadi, nunka el ka paxonaba pa argen bunita asin. Nen pa Nininha na tenpu skola.

Intritedu na mei di kel sonhu y realidadi, Mane kume três santa mama di pratu di Djagasida, ku fijon berdi, ku galinha, ku massa, ku mandioka, sen sinti. So na bandera Sandjon, di kel anu, na ka Papa di Sacorro, el  kumeba txeu sin. El fika fartu ta da forgu so metadi. Pur isu, el ka pode ba detaba antis dijistaun. El ka dixa Manhol prega odju te meia noti. Es fika riba sisterna, na frenti kaza, el ku pe stendedu pa frenti, kosta ngostadu na paredi, rostu pa Bila, ta konta parti. El konta tudu parti kel sabe, el inventa uns, el rapiti otu, el faze Manhol purgunta, el rasponde purgunta ki ningém ka faze-l. Tudu so pa pasa tenpu.

Dipos es ba pa kama. Lolita tuma-l konta kabesa. El ka sabe se sorrizu, el ka sabe se rostu, el ka sabe se kabelu, el kasabe se korpu, el ka sabe se almufada kel ta konsentra na el mas. Kumo era ora di deta, parse ma almufada tormenta-l mas ki nun kuza. Ma Mane staba fartu suma kel grilu ke-l manda faze serenata na rua, xeiu suma kel almufada ki ka sta xa-l drumi. “Ma sin ke minina bunitona!” Di kel noti pa pramanha, Mane ba koko três bes. El manxe ku barriga mas aliviadu, ma ku kabesa na mesmu tormenta.

LER TAMBE: Mane Bobrona- Des bes ke bes!