Manduco

Fradu ma Festa di Sanfilipe staba sabi. Kanpu futebol xeiu na dias di Jogu, kurrida kabal ban di argen, Bila totxadu suma bagu na ruman, kumersiu movimentadu, rabulisu na rua, paxaun y amor pa tudu beku y prizidiu ta rabenta na pontada.

E sin propi ki du ta kre odja nos terra, sabi y ki ta dixa sodadi na tudu vizitantis, asin, ken ki ba Djarfogu ka ta diskise mas.

Tinha parodia pa tudu kantu. Afinal na kabuVerdi du ta kultiva parodia. Nos e un Brasilin ki ten sidu un bon alunu di nos instrutor. Pur isu, jovens staba tudu kontenti. Basta entraba na prizidiu pa odja kontentamentu na rostu inosenti di kada joven.

Palku di prizidiu tinha idulus di tudu tipu. So mesmu jovens di Fogo ten es privilejiu, pamodi na otu kabu, jovens ta ser obrigadu a apresia un konvivensia di artista y muzikas nativus ku artistas y muzikas ki ben di fora. Na Fogo, jovens e edukadu ma bon e so kes ki ben difora, ma es, se-s identidadi ka ten nada ki bale, nada ki debe ser valorizadu. Es e un koitadus ki debe ten otus jovens komu mudelu. Pur isu, ki responsáveis brinda-s ku es prisenti xpesial.

Dipos di festa, Bila manxe ku orina tudu kantu, garafas kebradu na rua, arguns pontus kozedu na kabesa di juventude komu tistimunha di ses sabura. Ma afinal, ki mal ki ten, si dipos di sabi morre ka nada. So kenha propi ke kontra e ki ta kritika un sabura di keli. Pur isu nunka es ka ta ser responsável pa orgnaniza kuzas dês         kalibri. Juventude gosta di tóksikus, badjus na prizidiu ten sidu un toksina kultural, antan paki muda-l. Pur isu tudu anu jovens ta fra: ‘festa di es anu staba sabi... es e maior festa ki dja fazedu...” e responsáveis ta faze es balansu: “Este ano as festas ultrapassaram as expectativas, mas mesmo assim, p’ro ano serão melhores...” Com isso, subentende-se que mais toxinas estão para chegar.

Festa kaba, tudu argen da un balansu puzitivu. Jovens riforsa ses kultura di parodia, pasa ta idolatra kada bes mas otus mudelus, enkuanto es foi pintxadu nun abismu kada bes mas fundu en relasaun a ses autoestima y valorizasaun kultural; responsáveis, ku denti kaskadu di kontentamentu, suma kel burru ki marradu na mar Azul, ganha pontus na odju di juventude komu grandi prumutoris di parodia y asasinus kulturais; artistas ki abrilhanta- nu festa leba ses bagagen riforsadu ku mas meius pa finansia ses trabadju y ses promosaun; nos artistas y nos kultura manxe kebradu y es ba tuma “kafe ku tedja”.