Manduco

Sanfilipe, 26 De Abril de 2010

Caro kumpadre Fafe Beludo

Kumpadre, es ano gó dja Nho perde um grande festa Sanfilipe. Es ano e fidjos de Diniz D’Ana ki bem da festa. Nho Lembra de Diniz, kel grande tokador de robeka, ki kantaderas ta kantaba Y ta fraba “Diniz ê bonito…Diniz ê janota…Diniz ê ratorku…Diniz nesse na hora ki oru da ponto”? Paxenxa, nho ka pode sta li. Guentis di tudo mundo dja bem Y otus sta pa bem. Dja bem tê manku, cego, kololu, mudo, surdo, dodu, talobasku, simplorio, diputado, ministro e prisidentis. Dja bem tudu kasta di arguem.

Festa di gossim sta diferentim, kumpa! Nka sabe si e celebracao de dia di trabadjadoris oh dia de Nho Sao Filipe, má nha boka ka staba la. U ki é certo ê ki festa sta ku badjo, jogo, kurrida kabalo, y tudo kusa ki nho ta gosta.

Kumpa, nho sta Lembra de Sanfilipe de bedjo? Nho sta Lembra di Funana? So mes de Abril entraba, primer barco ki ta binha di Praia ta trazeba el. Ku se bengala na mon, ku kel pé falido (manku), sorriso largo na rostu, Funana ta invadiba Bila. Ta da baxu, ta da riba, ku kel pé ta tchalunkem, tchalunkem, el ta anunciaba: “djam bèm…djam bèm…festa dja kumêssa). Tudo mundo ta fikaba kontenti pamo Funana dja tchigaba e festa staba proximo. Dito e fêto. Poko dipos, guentis ta kumessa ta baza na Fogo.

Movimentacao e diversao ta komessaba. Anterim pa um lado, Tchòpa pa kel otu, Gripino pa se lado, e Leao pa dissé-l. Tchitchiti ta rapika tambor, Nho Sopa ta kanta, Idalina ta kudi baxom. Grogu na ka Kapioka, cerveja na bar Dadi, marisco na Nêne de Lapa, festa na instituto, badjo na prizidio, jogu na kampu, kurrida na arto Sampedro, Vivico na pruvidencia, Xico na preparacao, Djódji na organizacao, Fanhô na sê kabalo, Pazim na se panela, Tchitchico na se xerem, Tchòpa ta da dodu, imigrantis ta da ses show, pikenas ta da pinéu, negocios tudu movimentado. Enfim…Bila ta staba rafugado!!!!

Ês ano, kuza kim atcha stranho kumpa, e pamo ki éz ka konvida Ramiro Mendes pa bem toka. Parcem ma Diniz Dias Da Fonseca ta prifiriba um bom “ora di bai” na violino, ku monzada Nho Nani e orquestrado pa Ramiro Mendes em vez de Kassave. Mas de tudo, ês ano sta celebrado um Sanfilipe, ku promessa de bira-l, kada bez mas tradicional. Talvez kuzas muda.

Kumpa, dja-n pidi nossiora Sakorru pa da nho forca ku saude pa nho bem te Djarfogo pa nho bem da um festa Sanfilipe. Kela go si nho da-l kumpa, du ta bate rikordi. Du ta faze-l so ku artista di Fogo pa du promove nos tradicao ku nos kultura. Si kassave bem, ez ta bem so abri palko pa nos artista. Nho djunta dinhero dretu pa du bem da kel festa bedjo pa tudu arguem kume avontadi teki biko stika stiky.

Kumpa, nho diskurpam, mas ‘ntem ki ba pamó ‘nsta ba Kobom, kumê um xerem ku bodi la na ka Mané Kanhobá. Oji el sta fazê um festa di batismo sê katcho.

Tchau.

Lion De Cobom Grande