Manduco

Dos kumpadri kontra na boka tarde, ez komenssa ta divaga na komberso. Ez papia na tudu assuntu. Di rapenti ez pass-l pa gramatika

Fafe Beludo: Kumpa, kumo ki ta skrebedo café, cu “c” o ku “k”?

Lion De Cobom Grande: Kumodi? Ferbe café ku capa?! Café ka tem kapa.. Café tem nganha, cumpadre! Nho e burro!

Fafe Beludo: Ferbe naum kumpadre! Nfra nho, skrebe!  kumo ki ta skrebedo café, cu “c” o ku “k”?

Lion De Cobom Grande: Ami gó ê ki ku screbe café cu “c” o ku “k” ?! Unico kuza ki ta interessam sobre café, e pa el sta bem doci ora ki mudje po-l na menza! Tambe pam tene um bom ajunta pam sola!

Fafe Beludo: Kumpadri, nho go, papia ku nho ka bale pena, e so perde tempo!

Lion de Cobom Grande: Sim kumpá, ami ku nha fomi, nho sta bem pargunta-m kumo ta skrebedo café! Dja nho torna lembra-m ma ‘nsta in jijum.

Fafe Beludo: Nho ba djudam diskapa mindjo pam po na bidom pa simentera, ‘nta da nho um quarta mindjo pa djanta!

Lion de Cobom Grande: Okay, nta ba. Ma kumpadre, nho ki sta armado em esperto, ja ki nho sta bá tra capa di mindjo, nho pode fran kantu letra tem na palavra capa di mindjo?

Fafe Beludo: Kel go nta fra nho el gossim! Palavra capa tem 4 letra: c.a.p.a. Ami ê ka kel analfabeto ki nho sta pensa!

Lion de Cobom Grande: Cumpadri, nho go ê propi trazadu! Capa ta skrebedo so ku um letra, kumpadri ,“k”. Pa kuze c.a.p.a. pa skrebe capa si dja du tem “k” so kum letra?!

Fafe Beludo: Nho ê komplikado kumpadri

Lion de Cobom Grande: komplikado e kenki inventa gramatika. Kel dia kel invental el staba bam d’agu. Forti kuza ki ka tem pé, ka tem kabessa.

Fafe Beludo: Kumpa kel gó nho tem razaum sim..El stába propi mocu. Sê gáta pom lêba pó dimás. Nho imagina: kantu ‘nstaba na terssera classe, um dia 'n ba kuadro pa skrebe palavra osso…mi na nha burreza, 'n krebe: oçu! prufissor bazam po, el fra-n ma el ta screbe o.s.s.o. Dipos el mandam pam skrebe aço…na nha burreza nscrebe asso…pó maz um bem.

Lion de Cobom Grande: Uffu kumpa, Pasenssia!

Fafe Beludo: Mas prublema e kantu el mandam pam skrebe: "O Fafe Beludo e um menino nescio".  La go 'n mixa pé: ‘n bira ka sabe si ta screbedo nessio ó necio. Primero 'n skrebe nessio...barapo! Dipos nskrebo necio, ago ki e barapo! Prufissor manda-n ba sinta, ta tchora, ku kadera kenti, perna tudu mixadu, nariz so katarru. Kel dia 'n passa mal, pazbia um "c" ku um "s" konfuzo.

Lion de Cobom Grande: kumpa, nhô du bà bôta um águ du dixa di papia asnêra.  Nos e dos analfabeto! Anho e necio. Ami e nessio. EZ otu e nescio.  Ka nada ku nho, e ca nada cu mi, ponto paragrafu final, na otra linha travissaum.

Fafe Beludo: Aiai…skrebe du ka sabê, trabadjo sta fodóku, economia sta mariadu, nton du ba bota nós agu.

Lion de Cobom Grande: skrebe nka sabe, ma bota gó, tê dentu sukuro.