Manduco

Qanto Fogo era um mundo más rural, unde cada arguem ta construiba se casa na se propi padjigal, história(parti, passagi, anedota) era fruto de nós propi vivência e convivência, cu bastante realce de nós dia-a-dia.

Foi assim, que surgi história de Maria cu Mané na grande padjigal de Djarfogo.

Estaba ta corre um zunzum na meio de vizinhança ma Maria, mudjer de Nho Djon, estaba ta “come se cusa”, o midjor, ta prega-l partida cu Mané, dja faze tempo!

Nho Djon, home puro e,tambe, ruspetado ca liga boca de mundo. El fica ta bai se padjical e na bocal tarde, dipos del da limaria comida e ordia tudo cusa de casa el fica ta bai despadecê cu amigos na impena casa de Nho Francisco, p’es conta na mormanso de caladal tarde tudo quês partis de tempo antigo.

Rapazes, amigos de Nho Djon, cumo és estaba ta odja postura de Maria cu Mané como um farta de ruspeto, és insisti na fra Nho Djon pa bizia Maria ora quel bai padjigal, pamode el esta contra cu Mané na Rubera fretchal.

Nho Djon obi e el sigui instrução de amigos.

Qanto era 9 hora, dipos de menis bai escola, Maria panha se bala, ordidja el marra riba coxa, el spia tudo cabo, el fitcha porta e el po tchabe na aldjibera, pronto pa sigui pa ladera scoral.

Mané estaba na Padjigal cedo. Dje-l daba cabra comida, pega cabritos, ordinha partes de cabra e pronto na boca curral ta espera Maria tchiga.

Nho Djon bá  pa mar dento cedo, moda el fra Maria, p’el pode disfarça esquema montado.

Na verdade, Nho Djon estaba dento cedo na padjigal, trás de um penedo cheio de purgueras, carrió, sacaitano e lacacan ta acompanha trajetos de Mané e Maria.

Maria tchiga pé de ladera scoral banda 11 hora. Tempo estaba cu sarrason ta passa de vez enquanto, ora ta abri, ora ta fitcha, momento especial propi pa faze manobras dês tipo.

Cumo dje-s tinha habito de encontra na quel rubera e na mesmo lugar, Maria bai recto quel pé de burguera e Mané ba se trás.

Cinco a dez minuto, Nho Djon ba pé dento pé, el odja Maria detado cu pé riba de umbro de Mané ta baza coxo, ta grita baxo, cu dor quê ca dor, ma ta grita!

Movimento de Mané era fugoso e tudo és estaba cu argum tensão na quel preciso momento; talvez era presentimento de consciência culpado.

Antan, qanto Nho Djon obi Maria fra: Mané bu ta mata-m(!), Nho Djon quenta passo e el grita: Ah Maria, nha Mudjer ! A bo mê, só se forçado!

Obido voz de Nho Djon, Mané finca pé corre pa ladera e Maria, mudjer esperta e fingidera, fica tudo engasgado ta tchora.

Qanto és volta pa casa Nho Djon faze um festa bedjo cu sê mudjer e el dana cu tudo ses “amigos”.

Mané, cumo nobidade tchiga obido de sê mudjer, es fica de zanga pa argum tempo.

Má, certo dia, Mané, esperto que nem Bucajo,arma um truque cu intenção de provoca Maria de noite riba cama.

Fingido quel esta lebado na sono, el xa se pra baxo que estaba ta da pilada encosta na costa de Maria e el fra: Cuze que bu sta da pilada pa bu corda-l; bu ca odja ma nhos esta danado?

Maria, que dja estaba chateado cu greve fome, responde: Mi cu bo du esta danado, ma cuel não.

Cabo serena, menis corda e baxo pano quel mas grande fra: Papá cu mamã dja compo.

Assim era vida de nós padjigal de Djarfogo.

Napoleão Vieira Andrade