Manduco

Es ê storia

Di un kristãu kriston

Ki konsideradu vilãu na se vilon

Bira sidadãu n’un sidadon

Ki ka diskise di se violãu- un violon

Nen di se karsãu, nen di se karson

Ki kumê mankarron antis mankarrãu

Ki São faze kantu talaia baxu era son

Ki se primu di makakãu txuma di makakon

Pamodi Kókó na se madjon

ki traze-l ka Ma(ria)-João

Di pundi, El kumesa se misãu nun mison

 Te ki un dia el bira manson

Suma gatu na mansãu

Ma sen dixa di regressa pa  se vila, un vilon

Pa rasolve prublemas ku vilãu

Ki  kókó-l na madjon

Antan obi:

Antãu ê di kes kristau

Ki ta tene krista labantadu

Pur isu es ta txuma-l "galu kriston"

Dipos di monti prublema

Na se vila ki era un vilon

El bira ta odjadu komu un vilãu

Antan, el rasolve muda di vila pa sidadi

El muda pa un sidadi ki era un sidadon,

Kel ka era grandi prublema

Pamodi el ê un sidadãu

Di tudu lugar

Antãu ka diskise di sê violãu

Un violãu grandi, pode fra: un violon

Ki sê pá trazeba  di merka

Tanbe el ka diskise

Di se karsãu Adidas

I di un karson pe kunpridu

Kel ta lebaba festa txeu bes

Na se viaji,

El ba ta kaska i ta kume uns mankarron

Ma, kantu el txiga, na ora jantar

Pratu era galinha ku mankarrãu

Fetu pa sê bunita prima São

Enkuantu talaia baxu era son

Dentu kel

Se primu Ermitãu txiga

Txukidu dentu un makakãu azul

El spia-l di pé da na kabesa

El fra-l:

“Ah nha primu, bu ten transus txeu,

Bo e propi un makakon”

Ermitãu konxeba sê primu dretu

Dj-el sabeba ma argun disgrasadu

Dja kókoba Antãu na se madjon

Ki ka nen mesteba konfirma

Ku se tia Ma(ria)- João

Antãu tinha ki kunpri sê missãu

Pa kel, El ta fazeba tudu

Sê tia fra-l p-el ba misa

Antan, Antãu obi konsedju

Sê primeru misa foi di Sandjon

El kumesa logu n’un mison.

Má antis balá nborka

Fradu ma Antãu dja biraba manson

Suma gatu tratadu na mansãu

Ma dipos el volta pa tras

Pa sê vila, un vilon

Pa justa konta ku vilãu

Ki kókó-l na se madjon