Manduco

Mi ê fidju’l DjarFogu

Tanbén, netu di Burkan

M’tâ vivé na dizafogu

Di riku m’tên korasan.

M’kâ detâ na kurpa

M’tâ kubrí ku pekadu

Y si argun bês m’ rápa

É pá’m ka fikâ kaladu.

Naris kâ di papelon

Obrigadu kâ pâ kaleron

Tudu dia ê Sandjon

Desdi Bila â Tongon.

Sin bibê’l m’kâ suja’l

D’odju p’oredja ê 4 dédu

Sê kâ armosu, bu tâ djanta’l

Más un sertu, ki 2 buadu.

Obi konsedju d’ês sen létra

Midi sabidu ê kâ ku parmu

Pâ tiru kâ saí pâ kuletra

Pâ truta bu ten ki ten armu.

Sê juíz ê djogu, atitudi ê trunfu

Pâ Ómi sentimentu ê kâ búfu

Mi ê di txada â má di ladera

Ês nhâ pó di… ê só pâ larera.

Nhâ kuspím tâ muga kamoka

Atrevidu ê bo, kunfiadu ê móska

Karneru ê mi ki nesê ku nhâ lan

Nes fiu d’Ómi, m’kâ tâ kaí kan.

Pur isu, m’stâ bá Musteru

Pâ’m bâ konkistá kriola

Ku kobersu ò ku dinhêru

Na nhâ sorti, m’kâ pô bitóla.

M’krê, krê y gozâ nhâ vida

Sinti’l asás y di nhâ manera

Kâ nhôs kriâ regra na nhâ lida

Na nhâ éra m´tà skodjê nhâ êra.

M’stâ tâ bá Rubera’l Djêu

Pá’m bá ranja más 1 krêtxêu

Ku inosênsia â má ku nusôn

Di fidalgia d’ês nos djerasôn.

Pâ gozâ, m’stâ bá sen médu

Pâ mi kâ tâ pontadu dédu

Ken ki odjâ’m tâ saí pâ ladu

Ken ki txiâ’m,tâ fikâ dodadu.

Na Talaia, Balenti ê Bidjê,

Kansela, ê Kabál di Sensân

Ki di Musteru, pâ Bertxê

Ê sima Davidi ku Sansân.

Si n’ês viaji m’ka ranjâ kriola

Ê na Patim, k’ês fazê’m rióla

Kês fatisêra di rostu fasóla

Si m’pegás, m’tâ ratxás katxóla.

Ê kâ kunfiâ na sapatu’l difuntu

Nen s’ês dan, brasu m’tomâ dedu

M’kunfiâ mundu, mi ê indiskrétu

Na fin m’tâ somâ nha (kun)fiádu.

Pâ tudu isu m’ê fidju’l DjarFogu

Pâ dizâforu nétu’l di Nho Fabian

Ki vivêba rifadjadu má sin inpregu

Má, riku kâ tinha 1 igual korasan.

Por: R Kardozu - 2008