Manduco

M’ kosta bu kabesa na nha petu

Skuta es fervor di nha korason

F’la’m nha amor si m’sta perfetu

Si es batimentu e ka nha impreson.

Disha’m bejabu na bu boka

D‘sha’m dabu um beju di kretxeu

Ku’m kalor pa bem abri’m nha Séu

Pa nha distinu fitxa se doka.

Skuta’m es klamor di nha dor

Dja’m pedi Sol pa da’m se valor

Séu pa djuda’m vensê distansia

Mar pa leba’m sen turbulensia.

Pa’m ba brasa nha kretxeu

Ki um dia singra na Mar y Séu

Pa un distinu i un inserteza

Ma ki vida podê fazê un beleza.

Skuta'm, amor ês nha komuson

Sinti na bu alma es nha paishon

Di um ser ki sofri sem razon

Ki ta troka se alma pa bu korason.

Por:R.Kardozu

25-02-1990