Manduco

Amigus, m’ten di fundu

Uns ê tortu , otus ê stupendu

Ten kés ke amigu di petu

Otus m’ta tratás di otu jeitu.

M' ten uns ki tâ fazen txora

M’ten otus ki tâ faze’m midjora

M’ten kes ki tâ faze’m ora

Desdi otrora a es mundu fora.

M' ten uns (até) ki ben di fora

M’ten otus ki mundu birâ féra

M’tem kes ki ta parce na ora

Desdi ês terra a otu’s esfera.

M’ ten amigus di tudu pé

M’ten uns ki na és m’ten fé

M’tem otus ki inda ka alguén

Mâ txeu dés ê só pa Kafé.

M’ten uns ki m’ta txuma pa Zé

Desdi kumesu a kuzas k'és ten

Di más bedju sê nomi ê Lélé

A más nobu ki’m ta txuma Nuné.

M’ten amigus di prinsipi a fin

M’tês na kaza a má na kamin

uns tâ da’m tudu, ta fikâ sisin

Otus ta prumete’m konfin…

M' ten Mané, m’ten Ntonin

Di oji Pélé a onti Bitchin

M’ten riku, pobri i indigenti

Ma nha amor pa és ê inosenti.

M’ten amigus di tudu nomi

M’ten di fartura m’ten di nhani

M’tês di basi tê ki tchigâ kumi

M’ka ta kansa ku amigu, nen ku lumi.

Ês ê di mê', ês ê nha trasu ó transu

Ês mundu és ben, pa da’m un abrasu

Desdi nhas surizu a nhas dizenlasu

amigus ê konsolu di nas frakasu.

Amigus ê fé, mesmu sê câ él

Él ê tizoru ki tudu arguen debê tel

Pa mau amigu bu ka ta garda-kosta

Bu inimigu bu bai bedju na frosta.

Por: R.Kardozu - July 24, 2008