Manduco

       Fafi Beludo spia pa tras, pa ultimo bes, pe-l sana se ma ku ses ermuns mas miodu sakedu na porta ses funko. Rua staba cheiu di guentis sakedu na bera caminhu, ku rostu na tchom, e odju boiadu d'agu. Fafi Beludo, ku se fatu kasimira, tchape na cabeça, maleta na mom, funda ragatu, sai di kel otu ladu, vira skina, subi kutelu e disaparce de vista. Na porta funko, Katrina, Negu qui pari ku Branku, odja se primer fidjo, ''se odjo di odja'', desaparece di vista, dentu kel puera ku lumi di mes de maio.

       Fafi Beludo tchiga Bila mei dia em pino. Rua staba em dem! El dixe na rua ka Filipe, rumo Fonte Bila. Na porta ka Anrike Tongom, Filemi staba sintado ruba um saku mindjo, ku rosto pa ceu, ta kume se piran cu açucra, animado, ta spera loja torna abri. Boa viagem, Filemi deseja Fafi Beludo, ki rasponde so ku um sorrizo amarelo. Lion Di Kobom Grande staba sintado na banko praça e kanto el odja Fafi Beludo soma na skina, el da um sorriso de satisfaçao e sol de mei dia reflecti kel kolar de oro gross kel teneba pindrado na piskos.

Imediatamente el sake, el pega na koz di carça e-l puxa-l riba, dipos, el busso kel reloji de oro de aldgilbera casako el spia ora. Bo e pontual, suma Maricano, Fafi - Lion fra! Djam odja ma bo bu ta tem sucesso na Mecka, Lion da-l coraji. Lion pega na se maleta, es dos, triste-kontenti, funda pa Fonte Bila, rumo a mundo mas balenti.

       Lion De Kobom Grande binha de Merca na mes de Dezembro. Djel kumpra um sobrado na Bila e djel faze um kasona na fora pa se ma ku ses ermuns mora. Gossim el sta ba Merca pa tras pel ba rasolve se assunto de reforma, pel bem mora, na Bila, na se sobrado, lado ku lado ku kes primos ki bedjo ka ta ligaba el pamodi el e fidjo de fora. Se ermum mas novo, Xaxi, que ta mora na California tambe sta bem na proximo ano, e el tene ngana kumpra kel sobrado di se bisdono, pa parti se pai, ki sta romba, pel compol freskinho. Lion fra Fafi ma tcheu guentis tene raiba del ku se ermum pamo es sta cumpra sobrados di branko, na Bila, ma el ka mporta pamo el kumpra-l ku se dola, sor de se testa. Inda es ka odja nada!!!Sta tcheu guentis ta bem pa tras pa Cabo Verde pamo vida na Merca e trubulado.

       Fafi sta animado pamo se tio Aniba que sta na Wareham, Ma. tene um trabadjo pa el na Cranberry bogs garantido. El ta kaba tchiga el ta cumessa ta trabadja, pel djunta dinher suma burro pel manda faze se sobrado na bila, bera greja, e pel tra se guenti de miseria na Lagarissa. Fafi Beludo e um kabal de rapaz; omi de coraji. Ano passado el monda um quarta mindjo el so, dentu kel lumi de sol, sem sustento, sem deskanso, so cu esperança de um bom colheita, que infelizmente frakassa, nao por falta de tchuba, mas por causa de praga, kel bitcho preto, ke kume plantas te raiz. Ano passado go Fafi desanima, desanimado. Nem pasto pa limaria! Felizmente se tio Aniba ka diskisse del.

       Kanto Madalam, kel barco ke ta ligaba Merca/Cabo Verde, subi ferro fundia riba, dja staba noti fitchado. Kanto el pita na saida de Fonte Bila, Fafi tchora boka largado e Lion pega na se viola e el começa ta toka e kanta ''ora di bai bo e triste'' num ritimo lento e dolente. Fafi spia pa ceu em agradecimento e el sorri kanto el lembra kel poema de Chefi que ta fra '' Lem// bairro pobre e desprezado//, onde nao existe a agua // nem a luz electrica// onde o passaro nocturno canta e condena// tu, ca, cagaras'' e tambe el lembra de kel dizer de Fogo que ta fra ''Quem nasce pra pataco nao chega a vintem''. Es dos recordaçao dal mas vontade tchiga Merca, undi impopssivel e possivel. Noventa dia Madalam badja ku neptuno na kel mar, ora brabo, ora manso, num esforço subrenatural, pel leba fidju de ventri kriolo, ate terra de tio Sam.

        Primero karta ke Fafi skrebe, el manda lembrança pa tudo vizinhança. Intchido de coraji, el manda fra se ma, ma Merca e um terra undi ke Deus anda ku se pe. Inda el fra se ma, pel ka perde fe pamo destino staba riskado: Fafi Beludo, fidjo Katrina, neto Santa, bisneto Ximento, trisneto nho Lau, kel omi ke ta karragaba kabal ruba de umbro, nesse na funko, pel morre na sobrado. El nesse pel mostra ma agoru de bedjo dja sai de moda e ke boka burro ka ta subi ceu.

        Kanto Katrina, negu que pari cu branco, rassebe kel primer carta ke bem de merca el sorri ba totiz. El pega kel karta, el labantal contra sol, e kanto el odja dola dentu del, agu kumessa ta bazal de odjo. El po duedjo na tchom el pidi nhordez, ku tudo santo ki tem na ceu pa da se fidjo, Fafi Beludo, mulato janota, bida ku saude. Karina nem ka sabia ke se vida na funko teneba dias kontadu e ke se fidjo, Fafi Beludo, trisneto Nho Lau, ta binha ser um di kes ki contribui pa ''sobrado que sobrou dos sobrados soçobrados; orgulho-ilusão duma classe que o tempo destroçou '' e ke el ta binha ser um agente ke djuda reconstrui kel mundo, kel vida e kel sociedade Foguense ke mulato kria.