Sino greja rapika doze pankada ; fogueti rabenta na ceu; pupada, gritaria, buzina tuma na tchada. Sol brandu, bentu folgadu, dia suavi, natureza em culaborassaum ku es dia sabi, tantu pa Tarexa, mulata tchobeta, hoji fetu sinhora, komu pa Fafibeludo, maricano sem dola, qui hoje sta puxa se sassenta riba. Na rua, tudu mundu sta da se palpite. Niuguem ka kre sabe kuze ki Fafibeludo kre o kuze ki Tarexa sta pensa. Omis ta fra Pa ki k-el kasa ku kel katrefa e mudjes ta pensa pamo kel kasa ku kel omi taum bedju. Di kalker forma, festa staba bedju propi.

 

Na bespa di casamento, kabu staba movimentadu. Vinho na barril, gorgu na tambor, baka pindradu, porku na lumi, bodeku na korda, panelas na lumi, mandioka na kaleron, batata na borradju, quejo na sintchu, longuissa na kambilitchi, mininus fartu, omi ku mudje: uns na badju, otu na baradju, restu na ordi, kes otus na disordi. Mino di Mama, ku se kopu a mas, el ka purda se gaita... Oh Mino, Oh Mino di mama, mundu krebu ki fari bu ma...Kabu sta rafugadu. Tudu sinhoras, tudu omis ruspetadu, tudu konvidadus, te rusgadoris passa sabi. Era festa maricano, omi ku se idadi puxadu, ku um minina novinha ki pode serba se netu.

 

Fafibeludo baba merca na tempo Madalan. El sai di Cabo Verdi rapazinho novu, dentu se 18 anu di idadi, pel ba djobe um vida midjo. Noventa dia di viaji na kel agom di mar, di Djarfogu pa Merca e ka brinkadera. Kantu arguem ki ba e nunka ka tchiga, ki margua! U ki e certu, e ki Fafibeludo ba. El trabadja suma burru, vive suma kabalu, drumi suma galu, pel odja sel ta consigui ranja um troku rapidu, pel volta pa Cabu Verdi pel ba casa ku kriola, mudje di se bida.

Nha guenti, na Merca tempu ta passa fassi, dinheru ta djunta divagar, distinu ka ta purda. Um keda um pankada, passa kuasi cinquenta anu, Fafibeludo na outonu di se vida, korda atrasadu e el pargunta: kuze ki contisse ku nha juventudi? Ja omi raformadu, bastanti inkonformadu, el ruma se maleta, e se distinu e Djarfogu, pel ba mata sodadi. Sodadi di kriola, Sodadi familia, sodadi Djarfogu.

 

Tarexa, minina morena e enkantada. Se peli fino e luzidiu cu se kabelu pretu e eskorredaiu ta disfarssaba tanta miseria e fomi enkuberta. Irma mas nova di onzi irmandadi, sem pontu ki da, ku medu sigui distino di kes otus irmas, Tarexa, nunca pensa na kasamento. Sempri el pensa na faze um vida menus sacrifikadu. kantu el tinha 11 anu, el da pa Bila. El ba trabadja komu empregada - kriada - na kasa Nha Filipa. Nha Filipa, mudje distinta, di korassam nobri djudal kel kel pode, mas erba era konta kanhotu. Seti anu passa Tarexa consigui ranja so dos minim, mas nada: um matchu um femia e te oji ninguem ka sabe kem ke pai karnal.

 

Kantu Fafibeludo tchiga Djarfogo, el pensa ma aeroportu ta staba xeio di guntis ta speral, ku fogueti, musika, festa, rabulisso e sabura. kantu el tchiga kabu staba em dem! korassam biral kontrariadu, tristi e diziludidu. Dal so ngana tuma aviaum el ba Merca otu bes. kabu staba stranhu, arguem tudu diskonchedu, guentis antigu tudu dja morre. Di se familia, kel sabe, fikaba so Rufino. Kantu el baba Merca Rufino, se sobrinho, ka nesseba inda. Dipos ki Rufino, omi ratorko, fral mantenha, es da pa kasa. Kantu el Tchiga na kasa, ki el odja mudje de Rufino el spanta, e el fra: Forti dja bu parce Jonia nha irma! Rufino fral: Tambe e se fidju. El parce-l propi. Se fidju? Fafibeludo stranha. Sim, mi ku Rufino nos e primo ermum, fidjo dos ermum - mudje di Rufino confirma. Nos familia go e badi, es gosta di kasa primu ku primu...mama ku papa tambe era ''cousins'', Fafibeludo ramata...oh, well, suspiro!!!

 

Tcheru di karne assadu, sabola rafugadu, ku faba guizadu intchidi dentu sala visita e Fafibeludo fika ka sabe ki ora kes ta fra nhos bem kume, pamo kel tcheru dja abril pititi. Djel lembra kantu se ma ta fazeba kes kume sabi, kel ta kumeba teki pratu limpa, teki bico stika. Mas ricordassaum volta-l na mimoria teki agu boial na odju e el kumessa ta tchora suma mininu, diskonsoladu.

 

Um voz anuncia: jantar dja sta na mensa. Bingo! Rufino ku se mudje labanta prakati. Fafibeludo katikati teki el labanta ta kramuxa, ''my back is killing me''! Um pe dianti um pe tras el sigui Rufino pa jantar. Kantu Fafibeludo entra dentu sala jantar kel da ku kel minina ku kor suma jambu maduru, korpu ku kurvatura feminina sensual, kabelu lizo e largadu ta tenta skonde kel beleza singular, el skapa involuntariamenti um, ''oh my God'' num autentico gesto di admiracao e manifestacao di amor a primeira vista. Ku um sorriso cativante e misterioso Tarexa ratira pa kuzinha enquantu Rufino ku se mudje devora ses triceru i ultimo refeissaum di dia, na midida ki Fafibeludo, kurioso, kreba sabe kenha era kel minina balelosa kel kaba di odja. Num voz baxo Rufino fra, tio, el e bom minina ma e-l ka tem kabessa. kada dia e-l ta sta ku um omi. E-l tem dos fidjinho sem pai. E nos ke pai e nos ke mai. Du tem dor de-l.

 

Pramanha kantu manche, dipos di kel noti mas kumprido di se bida, Fafibeludo purfuma, grampona e el fra Rufino ma el tinha ki ba lagarissa spia kasa di se ma ku se pa e pel ba mata sodadi e deskansa uns dias. Si bu sta ba fika la, midjo bu leba Tarexa ku miniz ku bo pel pode djudabu teki bu ruma tudu kusa, Nha Filipa, mudje di Rufino sugiri. '' yeah, sure'' - Fafibeludo konkorda, ku odju raguilido na kabessa. Kantu Nonoti tchiga pa faze kel freti pa Lagarissa, Jorbana, intchi kintal di karro tipi di maletas, caxas cu box. Nunka es ka odjaba tantu carga na ses bida. Dipos kes tchiga Lagarissa, noba korre ma kel Fidjo di Nha Katrina ki baba merca na kel tempo antigo dja bem. Povu djunta di tudu mundu: Cisterno, Kotcho, Tongon, Brandom, Lagarissa, Kutelo, Maiagomi, Kancela, otu guentis bem la di Kurral Grandi, Lomba, Sao Jorzi, Talaia e te di Musteru bem. Fafibeludo fika taum kontenti kel enkarraga Tarexa pa prapara maior festa di se vida. El dal ordi pel kumpra baka, porko, kabra, e galinha pa mata e pa da ku tambor na tchom pa tra mindjo, faba, bangolom, fijom, pa faze kume pa da tudu mundu kume, teki farta. Pa kume teki fika; pa katcho kume teki fika; pa da porku pa kume teki fika.

 

Djom Di Mane Donorfo baza mom na robeka rafugadu e tudu mundo passa sabi e es kanta ku ironia ''es propi ki e Maricano sem Dola''. Tudu mundu ngaba kumo festa sta sabi e Tarexa sirbi tudu mundo ku ngana, gentileza e morabeza. Kantu tchiga madrugadinha Tarexa pidi Fafibeludo pel badja um pessa, ma Fafi fral ma nunka el badja na se bida. Tarexa fra, ka bu priucupa, lebam di bu manera, nta ba suma bu lebam. Kantu Fafi po criolinha na petu, primer bes, dipos di kuase 50 anu, el odja ceu abri ku tudu anju ta kanta riguzijadu. El perta Tarexa, Tarexa pertal e es dos tchora, ngatchado, na petu cumpanheru. Tarexa sinti ma se futuro dja tchiga e Fafibeludo pensa ma se solidao dja termina. Tarexa sunha cu felicidade e Fafi jura faze-l se sinhora.

 

Kantu sino toka doze bes, ki nho padre fra djam pronuncia nhos marido ku mudje, Maricano sem Dola dja sabeba ma Tarexa staba dimas pa el, e Tarexa ka sta kriditaba ma destino tinha reservado tanta felicidade pa el. Pa dez ano Fafibeludo vive feliz e na cabissera se kama tres par di odjos ternos e gratus kumpanha-l teki, ku um ultimo susprio, el dixa es mundo, feliz. Tarexa ku ses Fidjos tchora marido e pai deskonsoladamente. Apesar de tudo, mundo nunka ka ntende ki Fafebeludo ku Tarexa foi um prisenti di Deus pa kumpanheru.