Manduco

DjarFogu

By Dr. Azágua

Txuma-m nha nomi

N ta kudi-bu

Nha nomi ê

Djon Barkinu.

N bibê águ

di tudu fonti;

Dósi

Sargadu

Móli

Salobradu.

Pilon pan

Txuba txobê

Ki dâ

Ki ka fartâ.

Junhu djâ ben

Fin di mês djâ txigâ

Sartâ San Djon

Saúdi na korpu

Pa dâ sórti

Pa trâ azar

Pa dâ azágua

Pa tudu banda.

Pilon pan

Txuba txobê

Séti dia

Séti nôti

Txêa korré

Pa tudu banda

Tudu rubêra bira riu!

Sistérna ku fonti

intxidu tê boka

Lama pa tudu txon

Azágua da pa tudu banda

Tud'argen panhâ na txon!

Tud’argen!

Ê mi k’é Djon

Djon di Nhô Barkinu

Limária N ten bós

Garnel na kintal

Ka un, ka dôs!

Têki-n bá Bila

N ka mestê trâ nha txapé

Pa-n sarbâ Nhô Serpa Pinto

Dja-n branku djâ!!!

Ki dâ

Ki ka fartâ!!!....

Ki dâ

Ki ka fartâ!!!..

Ê mi ki Nhô Djon,

Nhô Djon Azágua

Ken ki konxe-m

Konxê Baluárti

Ken ki kre-m

Krê DjarFogu!

Sin Sinhor!

Terra sábi

Ê nos ki ten

Kazas

Di tudu kualidadi

Di funku tê sobradu

Ku arsapán

Sen arsapán

Di têdja

Di simenti

Di padja

Di karapáti

Di pedra

Di taba

Di blóku

Di simenti

Di kal;

Txon di terra-bankadu

Di skôra

Ladridjadu

Simentadu

Kalsetadu

Suadjadu.

Gêntis grandi

Ten txêu ki fra

Mudjês bunita

Ómis ratórku

Minis linpinhu

Ê nos ki ten;

Tê ki bu ben

Du ta resebe-bu

Ku brásu abértu

Kêl ki du ten

Du ta da-bu

Kêl ki du ka ten

Pasénsia...

Nos korasan ê grandi

Nos ôdju ê abertu.

Basôfu

Finu

Sériu

Mandador

Radjador

Trabadjador

Gardador

Gastador!

Boka ríju ê nos ki ten

Ngana-nu nen pa ka tentâ!

Nos ê grandi,

Grandéza ê nos ki ten,

Tanbê na txon

Du ka panha-l!

DjarFogu!

Du ka da-l

Du ka bende-l

Du ka pista-l

Du ka fia-l

Du ka renda-l

Du ka poteka-l

Du ka troka-l

Nen du ka bandona-l!

E nos k’ê fidju

Fidju di burkan

Ken ki krê-nu

Krê DjarFogu!

Pratu terra

Nunka falta-nu…

Katxupa

Djagasida

Rolôn

Xerên

Papa

Gufongu

Kamóka

Batanginha

Pastel

Óbu roladu

Streladu

Kafé fórti

Kuskus kenti

Duranti dia

Duranti noti

Anu ta dentrâ

Anu ta sai

Ku brásu abértu

Ku kara kontenti

Sintadu ta spera-bu!

Ken ki ben

Ku bon korasan

Du ta purfidja-l

Du ta faze-l nos fidju,

Fidju di DjarFogu!

Y sês fidju ê nos fidju;

Du ta batiza-s ku skóntra

Du ta kaza-s ku vinhu manêkon

Du ta nterra-s ku inxófri!

DjarFogu ê di nos;

Di nos tudu!

Terra sábi

Gêntis benkístu,

DjarFogu nos txon.

Múzika,

Xoradinha!

Kêl k’ê bu gôstu!

Vióla

Violãu

Kavakin

Robéka

Bandulin

Gáita

Armóna

Karrupitu

Sinu

Inu

Renadu

Tanbôru.

Bádju,

Manêra ki bu krê!

Valsa

Mazurka

Morna

Koladêra

Paravanti

Tra dama na Prasa

Tana Nha Buloba

Agustu Nha Martína

Terra sábi ê nos ki ten!

DjarFogu! 

DjarFogu!

Ah, DjarFogu!

Speransa N ten

Ma un dia,

Un dia sértu N ta voltâ,

Pa nos ôdju bira kuátu,

Pa du bá matâ sodádi!

Pa-n bá matâ sodádi!!