Manduco

Pulítiku birâ nês éra prufison

Di A pâ Z ten ki ganhâ ileison

Djês bira tudu sen, ó ku inzenson

Asin, pâ és matâ fasi nós nason.

Dimo - és bira’l dedu pâ brasu

Krasia - piskós pâ kata - falsu

Ku ês dirijentis di dizenlasu

Tê nós alma stâ na faliânsu.

És tâ falâ di kor na prugresu

Na prinsipi és tâ dâ bikansu

Na fin tâ odjadu mâ és é fiansu

Povu tâ pagâ pâ sés frakasu.

Dimokrasia éra di otrora

Na kel tempu ki kâ tinha féra

Desdi ki nu koloniâ portugês

Mundu y fundu birâ insensatês.

Inventadu palabra pâ iludí povu

El ludibriadu ku promesa turvu

Tâ bejâ oji pâ soprâ, artimanha

Kára tâ muda…korpu tâ ferranha.

Arti di muga, nunka kâ muda

ken ki tâ bôla, nunka kâ funda

Kâ ten sabi ki kâ tâ perdura

Kâ ten fedi ki kâ tâ pirpetura.

Dimokrasia ê ditadura consentidu

Nun prusesu di kupla skodjêdu

Pâ és subi puleru és tâ karisiabu

Tê ki és kanta és tâ disprezabu.

Tâ dadu bida in troka di tronu

Nês tribuna és tâ flâ mâ és ê dónu

Di distinu di povu y di nós País

Ku poka vergonha, tâ tornâ pedí biz.

Ês pensâ mâ dj’és ganhâ ileison

M’ès podé mandâ na nós korason

Ki pâ sês pekadu sacrilégiu

És tâ ben tratadu ku privilégiu.

Di tudu un poku és ten razon

Pâ pekador tendu senpri konpashon

Tâ perduadu tudu sen da vazon

Sen inportâ si nu fikâ na indjon.

Uns tâ entra, otus tâ sai, ê jogu

Uns tâ subi, otus tâ kai, nês fogu,

Kantiga ê otu, mâ badju ê kel mé

Pâ kolâ-zuki nu ten ki finkâ pé.

Pâ prisenti ês tâ pulinu conbersu

Pa futuru és tâ abonanu tersu

Si oji nu vivé só ku un Kafé

Manhan nu tâ sintâ na kanapé.

Má, kadera ku bifi, é pâ ditador

Moshu ku pápa é pâ piskador

Ki tudu di midjor ê pâ sê sinhor

Ki kain rekuzâ és tchuma’l traidor.

Garfu ku faka é pâ orador

Kudjê moku ê pâ trabadjador

Ki di un dia pâ otu birâ impostor

El diskisê di sê asisor-prufisor.

Serku stâ serrâ, tudu stâ error

Konfiansa di gósi ê kâ promisor

Si pekadu di padri ê pâ sacriston

Nu kulpâ és mundu di ivoluson.

É kada braza pâ sê grelhadu

Ê kada sorti pa sê kuidadu

Uns ten sorti és ten sobradu

Otus ten dis - sorti di fikâ kaladu.

Si bu rikusâ és tâ afastabu

Si bu gritâ és tâ likidabu

Si bu falâ… és tâ ilugiabu

Si bu m’grashiâs és tâ distingibu.

Bu ten ki lenbé pâ és galarduabu

Ó bu ten ki skobâ p’ô kâ konfundidu

Pâ bu pé di galu ganhâ sinpatia

Kâ bu disfarsa, p’és kâ pobu na agunia.

Dimokrasia ten só na morti

Na el kâ ten rasa, nin sorti

Na dor, amor, riku ó indigenti

Nês tudu ó nada, é intranzigenti.

Pur: R. Kardozu - juliu 31, di 2006.